Plantun de Prouvènço

Pèr coumpara dos planto d'encò nostre

Malva neglecta & Chrozophora tinctoria

Malva neglecta

Malvaceae

Noms en français : Mauve à feuilles rondes, Mauve commune.

Descripcioun :
L'espinarc-d'Auvergno trachis proche dis oustau, dins li pargue à fedo, que i'agrado l'azote. Si fueio, verdo e cendrado, à limbe redoun e long pecou, relabon au sòu. Fai de flour blanco raiado de roso e pourtado pèr un pecou de 1 à 6 cm.

Usanço :
Coume soun noum lou dis, es uno planto manjadisso. Frederi Mistral (TdF) raporto que se n'en manjo li jòuini fueio. Pulèu li faire couire coume d'espinarc qu'arrapon un pau la lengo. Li fru peréu podon èstre cousina, an goust d'avelano.

Port : Erbo
Taio : Pancaro entresigna
Fueio : alterno
Tipe bioulougico : Teroufite
Cicle bioulougico : Planto de l'an

Gènre : Malva
Famiho : Malvaceae

Coulour de la flour : Roso
Petalo : 5
Ø (o loungour) flour : Pancaro entresigna
Flourido : Printèms - Estiéu

Sòu : Ca
Autour basso e auto : Pancaro entresigna
Aparado : Noun

Liò : Escoumbre e proche dis oustau - Champ
Estànci : Mesoumediterran à Mountagnard
Couroulougi : Pancaro entresigna
Ref. sc. : Malva neglecta Wallr., 1824

Maurello

Chrozophora tinctoria

Euphorbiaceae

Noms en français : Tournesol des teinturiers, Croton des teinturiers.

Descripcioun :
La maurello es uno Euphorbiaceae que douno d'èr pulèu à l'erbo-di-toro, Heliotropium europaeum, subretout que trachis dins li champ e flouris peréu à la fin de l'estiéu. Li flour masclo e femello soun desseparado. Se recounèis à si fru en boulo, cubert de berrugo e à si péu estela (fotò).

Usanço :
Emé la planto se fasié la tenchuro de viro-soulèu que servié à l'Age-Mejan à l'enluminamen di libre e tambèn pèr acoulouri lou manja. D'efèt chanjo de coulour, passo de blu à rouge, quouro lou mitan es acide (pèr acò se boutié li boursèu dins la pisso). Acò se retrobo dins lou papié Tournesol qu'utiliso la chimìo.